"وليه افتكرت أن الاسرائلين عايزين يقتلوك؟!
"علشان الأغانى اللى أنا غنتها عنيهم وعلشان أنا بينى وبين شارون بتاعهم تتش من زمان وعلشان غنيت لعمرو موسى وهما بيكرهوه وغنيت لمحمد الدرة وهما اللى قتلوه . وهغنى عن شارون وأعماله.
"وإيه حكاية التتش اللى بينك وبين شارون!
"شارون ده مش عايز يسكت إلا ما يولعها نار ولحد النهارده هو مش فاهم هو بيعمل إيه علشان كده لازم حد يوقفوا ويقوله وأنا مغنى فى أغانى جاية علشان يسمع ويفهم ويبطل بلطجة علشان أنا عارف انهم بيسمعوا شرايطى كلها.
"نسيب السياسة وخلينا فى الفن اختيار داود عبد السيد لك فى فيلمه "مواطن ومخبر وحرامى" غير موفق تماما وكاد أن يكون السبب فى سقوط الفن لأنك مابتعرفش تمثل ده كلام النقاد ردك إيه؟!
"يا أستاذ أنت مفكر أن التمثيل اصعب من الغنا اللى يقولك كده مبيعرفش حاجة وجائز اللى قالوا الكلام ده مش فاهمين دورى فى الفيلم أنا مش حرامى بجد بيسرق حاجات لا .. الموضوع رواية باسرقها فى الفيلم ولو فهموا الفيلم ماكنوش قالوا كده وعشان أغيظ دول واللى ذيهم أنا شغال فى 3 أفلام مع علاء الخواجة وحسين القلا وإسعاد يونس.
"لما أنت بتعرف تمثل ليه كل ليلة على المسرح فى مسرحيتك " دو رى مى فاصوليا" مع سمير غانم بتقول للجمهور أنا مش جاى أمثل أنا جاى اغنى أنا مغنى بس وتترك الرواية وهات يا غناء !!
"إحنا اتفقنا على كده من الأول أنا وسمير غانم أنا اغنى وهو يمثل معرفش بقى اللى محضروش الاتفاق معترضين على إيه وبعدين هو أنا مش مطرب ولا إيه.
"أليس صحيح أن المصنفات الفنية طلبت عدم ذكر اسمك كمطرب فى الإذاعة والتليفزيون وعلى شرائط الكاسيت وتحويلها إلى مونولوجست !!
"محصلش أى حاجة من ديه .. محدش جيه ناحيتى ولا مصنفات ولا غيره وبعدين ديه ناس شايفة شغلها كويس ليه عايزين تفسدوهم . وبعدين كلامى ده هو الصح.
"وإيه حكاية الإعلانات معاك!!
"أنا مطرب شعبى وكانوا عايزين إعلان للطعمية وهى أكلة شعبية وعلشان كده فالموضوع شعبى فى شعبى غنيت للطعمية فى الإعلان وبعدين الفكرة كويسة والعيال بيتبسطوا لما يشفونى طالع فى الإعلانات وشيفينوه فى التليفزيون.
"وإيه موضوع الشائعات معاك !!
"والله يا أستاذ أنا بيجى عليا أوقات بقول يا رتنى ما كنت مغنى ده جوزونى من وفاء عامر وخلوا أم العيال تغضب وروحت البلد والعمدة صالحنى عليها . وخلوا العيال بيشربوا بانجو ومخدرات وهما قدام عينى طول ما أنا فى البيت وكمان لما سبت ميت حلفا وكار المكوجية وبقيت أغنى بس وعشان خدت بيت جديد وعربية جديدة قالوا أنه نسى أصله وناسه وأنا يا أستاذ على طول بروح أزور أهل حتتى وأخواتى أنا ماأقدرش أعيش من غيرهم.